ភ្នំពេញ៖ រដ្ឋមន្ត្រីក្រសួងអធិការកិច្ច លោក ហួត ហាក់ បានជំរុញការភ្ជាប់ទំនាក់ទំនង និងកិច្ចសហប្រតិបត្តិការជាមួយក្រសួងអធិការកិច្ច និងស្ថាប័នពាក់ព័ន្ធនឹងវិស័យអធិការកិច្ចរបស់ប្រទេសជប៉ុន។

លោករដ្ឋមន្ត្រីបានលើកឡើងបែបនេះក្នុងជំនួបជាមួយឯកអគ្គរាជទូតជប៉ុនប្រចាំកម្ពុជាលោក អ៊ូអិណូ អាត់ស៊ូស៊ី (UENO Atsushi) នៅទីស្ដីការក្រសួងអធិការកិច្ច ថ្ងៃទី១៣ ខែកញ្ញា ឆ្នាំ២០២៣នេះ ដោយលោករដ្ឋមន្ត្រី ហួត ហាក់ បានលើកឡើងពីបំណងចំនួន៣ គឺការភ្ជាប់ទំនាក់ទំនងវិស័យអធិការកិច្ច ការធ្វើទស្សនកិច្ចផ្លូវការដើម្បីសិក្សាពីវិស័យអធិការកិច្ចនៅប្រទេសជប៉ុន និងស្នើសម្របសម្រួលជាមួយអង្គការជប៉ុននានាដែលមានវត្តមាននៅប្រទេសកម្ពុជា រួមទាំងអង្គការ JICA ឱ្យជួយសហការជាមួយក្រសួង ក្នុងការផ្តល់ជំនួយបច្ចេកទេសលើវិស័យអធិការកិច្ច។

លោកឯកអគ្គរាជទូត អិណូ អាត់ស៊ូស៊ី រីករាយស្វាគមន៍ចំពោះសំណើខាងលើ និងទទួលការពាំនាំយកសំណើភ្ជាប់ទំនាក់ទំនងសហប្រតិបត្តិការរវាងក្រសួងអធិការកិច្ចរបស់កម្ពុជា ជាមួយស្ថាប័នពាក់ព័ន្ធនឹងវិស័យអធិការកិច្ចរបស់ប្រទេសជប៉ុន នាពេលខាងមុខ។

លោករដ្ឋមន្ត្រីអធិការកិច្ចបានគូសបញ្ជាក់ ជំនួបនៅថ្ងៃនេះ ជាសក្ខីភាពនៃកិច្ចសហប្រតិបត្តិការរវាងប្រទេសទាំងពីរយ៉ាងជិតស្និទ្ធ ដែលឆ្នាំ២០២៣នេះ ជាឆ្នាំនៃខួបអនុស្សាវរីយ៍ការទូតលើកទី៧០ ជាពិសេសគឺទំនាក់ទំនងនេះត្រូវបានតម្លើងជាដៃគូយុទ្ធសាស្ត្រគ្រប់ជ្រុងជ្រោយ (Comprehensive Strategic Partnership)៕